​​

​

Bulacan Water District
Bulakan, Bulacan

Nos.: 792-0191 / 668-1499Mahalagang Paalala kung may Bagyo, Baha at iba pang Kalamidad Sa aming mga minamahal na tagatangkilik:
Nais po naming ipabatid na ang Bulacan Water District na itinatag alinsunod sa batas (PD 198) ang tanging tanggapan na namamahala sa paglilingkod ng tubig sa buong bayan ng Bulacan, Bulacan. Dahil dito, ang lahat ng  katanungan o suliranin tungkol sa serbisyo ng tubig  ay kailangang ipaabot sa aming tanggapan  upang daglian na matugunan o malapatan ng kaukulang paglilingkod.
Mga pangunahing katanungan ng mga tagatangkilik  kung may  bagyo, baha at iba pang kalamidad:

 

1.Bakit kapag nawalan ng kuryente ay nawawalan din ng suplay ng tubig at bakit matagal pang nagkakaroon ng tubig kahit may kuryente na?

• Ang mga “pumping station” o bomba na nagpapadaloy ng tubig sa aming mga linya o tubo ay pinaaandar ng kuryente at sa sandaling mawala ang serbisyo ng kuryente mula sa Meralco ay titigil din ang mga ito sa pagpapadaloy ng  tubig.

• Kung may problema o” Line Trouble” ang linya ng Meralco at hindi magkakaroon ng sapat na boltahe ang mga bomba ng tubig o “submersible pump” ay hindi pa rin mapapaandar.

• Ang mga tubong nag-uugnay sa ating mga pumping stations ay nababasyo sa oras na matagal ang pagkawala ng kuryente. Kailangang mapunan muli ang mga tubong ito at makabuo ng sapat na presyon o “pressure upang maitulak ang tubig at mapadaloy ito sa mga gripo.

• Ang ating mga bomba ay isa-isang pinupuntahan ng ating mga Pump Operators. Dahil nangangailangan ng ilang oras ang mga Pump Operators upang mapaandar ang lahat ng ito.

Sa kasalukuyan ay pinaghahandaan ng aming tanggapan ang paglalagay ng “generator” sa piling mga “Pumping stations” upang mapaandar ito sa sandaling mawalan ng kuryente. Ito ay inaasahang magdudulot ng patuloy na daloy ng tubig.

​

2.Ligtas ba na inumin ang tubig kung baha at nakalubog ang mga tubo ng tubig? 

•   Kung may baha at nakalubog ang mga tubo ng tubig, ay maaari itong mapasukan ng tubig baha sa sandaling may mabutas o magkatagas sa mga ito. Sa ganitong pagkakataon, makabubuting pakuluan muna ang tubig nang di kukulangin sa limang (5) minuto bago inumin.

Hinihiling po ng aming tanggapan ang tulong ng lahat upang maipagbigay-alam  sa amin ang mga tubong may tagas upang agad nating maipagawa at maiwasan ang tuluyang pagpasok ng maruming tubig sa ating mga linya o tubo ng tubig. Gayundin, ipinaaabot namin sa aming mga tagatangkilik na ang tubong papunta sa inyong bahay mula sa inyong metro ng tubig ay kailangan ding panatilihing nasa malinis na kalagayan at walang tagas o butas na maaaring pasukan ng maruming tubig.

Inaasahan po namin na makapagbigay kami ng mahalagang paalala tungkol sa ating suplay ng tubig kung may bagyo, baha at iba pang kalamidad. Kung may nais po kayong itanong o malaman tungkol sa aming paglilingkod ay maaari po kayong  magsadya sa aming tanggapan na nasa  panulukan ng Calle Estacion at Molina sa  Barangay San Jose Bulakan, Bulacan.(katapat ng “El Canto”). o tumawag sa telepono bilang 792-0191 o 668- 1499.
Maraming salamat po.

Ang Tagapamahala Bulacan Water District